Tesdawit n Bergara

Tasudut Tageldant tabaskit n Yimeddukal n Tmurt (Real Sociedad Basconcada de los Amigos del Pais), ay d-tesbedd trisṭuqraṭit n Azkoitia, tella d tagrawt tameqqrant akk ay yesselḥan tikta n "Teftilin" di Tamurt n Ibaskiyen. D tasudut-agi ay s-d-yefkan amedya i ugellid asemmeskal Carlos III akken ad d-yesbedd tisuda am nettat di tmiwa merra n Spenyul. Taburjwazit turruffit tamaynut tella tettnadi ad d-tesbedd yiwet n tesnakta "tanelsawt" d tamaynut i ɣef ara tebnu assaɣen-is akk d tḥerrsin , dɣa seg yimir-n ay yuɣal usseḥrres yettwaxdam s yisem n "ussiweḍ n tɣerma" s igduden ur tt-nessin ara.

Amagrad amezwaru n uẓayer n tsudut-agi yeqqar-d : «Iswi n tsudut-agi netta d asnerni n usselmed akk d ussebɣes n Yibaskiyen akken ad lemmden tussna, tiẓuryin akk d tẓuryin icebḥen, d tukksa n wayen n d iri akk d usselhu n wansayen-nsen, d tukksa n lqella n ccɣel d lqella n tmusni akk d unaḍeḥ mgal n yixeṣṣaren i yes d-igellu wanect-agi, akk d ussedjhed n tdukli ger n tlata n temnaḍin n Yibaskiyen [tispenyuliyin] n Alava, Vizcaya akk d Guipozcoa». Leqdic ifazen akk ay xedmen yirisṭuqraṭiyen n Azkoitia di lqern wis 18 netta d asbeddi n Tesdawit n Bergara di 1767, akk d unagmay-nni-yines ussnan ay imechurren. Tasdawit n Bergara tuɣal d tasdawit talaykit tamezwarut akk di Spenyul, d acu kan, xas akken tettekka deg wesnerni n tussna akk d yedles, maca tarisṭuqraṭit tabaskit ur teddji ara tutlayt tabaskit ad tuɣal d nettat ay d tutlayt n usselmed akk d unadi di tesdawit.